SERAPIO VARGAS
Entrevista: Annemarie Gunkel
Fotografías: Victor Zea
_JPG.jpg)
"Noqa paqarirqani waranqa isqon pachak iskay chunka kimsayuq watapi. Khunantaq llamk'akuni pikchurkuna horquypi haqay waranqa isqon pachak pisqa chunka iskayniyoq watamanta pacha.
Chay pachapiqa manan karqanchu munay pasaq llinp'ikuna, aswanmi karqan yana yuraqlla, lliwmi ruwakuq placa ninku chayllapi hinallataq película ima. Kay qhipa tawa chunka watañan kamakun tukuy munay llinp'ikuna hinaspapis tecnología chaywan phawaylla imapis aswanta ñawparin. Qallariypiqa munaq kani pikchur horquyta wawaykuna munay wiñasqanta hinallataq qhipaman aylluy yuyarinaykupaq.
Chaymanta pacha allinta yacharuspay chay ruwayman sayarirqani, manan sinchitachu yacharqani ichaqa pisi pisimanta ruwaspa yacharquni kay hina kaqtinqa waq Cámara Digital nisqaman t'ikrarqani, noqa kikillaymanta yacharqani pisi pisimanta aswan allin ruwayta wakichirqani."
.jpg)
"Yaqa soqta chunka watañan llamk’akuni kay Hawkaypatapi. Lliw pikchur horqupakuqkunamantaqa noqan kani ñawpakaq. Ñawpaqkuna lloqseq kani waq k’itikunata yunka uraykunata imaymana raymikunapi pikchur horquq qhepaman yuyarinankupaq, wakin kutinpiqa waharimaqku ayllukuna pikchur horquchikunankupaq sawaynakuy Bautizokuna ima kaqtin.
Lliw kay qhawarisqayman hina Hawkaypata hinallataq Qosqopas sinchita t’ikrarin, ñawpaq karqan pisi turista nisqakuna runa tiyakuqkunataq askhanpi, khunanqa askhallapuni kashanku runakunaqa.
Hamushallanin sapa p’unchay kay Hawkaypatata llamk’aq hamusqaymantapas noqaqa hamuyta munani anchata munakusqay rayku ima, tinkunitaq reqsisqa mana reqsisqa runawanraq, rimakuyku tukuy ima kaqmanta, munanutaq lliw ima kaq kay Hawqaypatapi tarikuq."
"Kay hawkaypatapiqa kayku yaqapas pusaq chunka pikchur horqupakuqkuna. Pikchur horquchikuy munaqkuna yaqa llapaykupaq ichaqa ñak’ayllaña aypawanku, kay Celular rikhurimusqanmanta pacha llamk’ayniyku chiriyan yaqa qanchis chunka porciento nisqapi, ñawpajqa manan karqanchu Celularkuna, wakin turistakuna hamuspa apakamuqku allin Camarallataña, ichaqa yaqa llapankuya chay pachapiqa munarqanku noqaykuq pikchur horqunaykuta.
Kay pikchur horqupakuymantaqa munani runa kusisqa pikchurta apakunku qhipaman yuyarinankupaq chaywantaq nuqa anchata amachani ruwasqayta. Kusisqa hinallataq apusunqullaña kani pikchur horqusqaykunamanta ima raykuchus paykuna teqsimuyuntinpi purín, mama qochakunaq sonqonta chinpan, hawa suyukunaman haykun ima."
.jpg)